banner
banner

Sİyasət

Əli Həsənov: Sovetlər Birliyi dağılandan sonra tarixə düşən ən qanlı faciə Xocalı faciəsidir

| Xəbər 1412 dəfə oxunub
Əli Həsənov: Sovetlər Birliyi dağılandan sonra tarixə düşən ən qanlı faciə Xocalı faciəsidir

Türkiyənin Kayseri şəhərinin Talas bələdiyyəsi ərazisində Xocalı faciəsini əks etdirən abidənin və Xocalı parkının açılış mərasimi keçirilib.

Trend-in müxbirinin məlumatına görə, mərasimdə Azərbaycan Prezidentinin İctimai-siyasi məsələlər üzrə köməkçisi - şöbə müdiri Əli Həsənov, azərbaycanlı millət vəkilləri, Rusiya Dövlət Dumasının üzvləri iştirak edir.

Qeyd edək ki, Xocalı abidəsi Kayseri Böyükşəhər Bələdiyyəsinin dəstəyi və Azərbaycan Təhsil və Həmrəylik Dərnəyinin təşkilatçılığı ilə salınıb.

Mərasimdə çıxış edən Azərbaycan Prezidentinin İctimai-siyasi məsələlər üzrə köməkçisi - şöbə müdiri Əli Həsənov Xocalı faciəsinə tam dolğun qiymət verdikləri üçün rusiyalı və türkiyəli deputatlara öz təşəkkürünü bildirib:

"Burada bir çox məsələlərə yer verildi. Rusiya Dövlət Dumasının deputatı Dmitri Saveliev, Türkiyə Böyük Millət Məclisinin deputatı Şamil Ayrım çıxış etdilər. Talas bələdiyyə sədri və digər çıxış edənlər Xocalı faciəsinə tam dolğun qiymət verdilər. Sözün həqiqi mənasında Xocalıda dinc sakinlər qətlə yetirilib. Onlar azərbaycanlı və türk olduqlarına görə qətlə yetirilib. Həmin gecə kim ələ keçib, hamısı öldürülüb. Hamısı bir-bir qətlə yetirilib. Hətta şəhərdən çıxan qocaları və uşaqları öldürdülər. Sovetlər Birliyi dağılandan sonra tarixə düşən ən qanlı faciə Xocalı faciəsidir. 1991-ci ildən başlayaraq SSRİ-dən ayrılan dövlətlər sərhədlərini qorumağa, müstəqilliyini inkişaf etdirməyə və firavan həyatı təmin etməyə başladılar. O gündən bu günə qədər ən qanlı tarix səhifəsi Xocalı faciəsi oldu. Ondan qabaq tarixdə bir çox faciələr olub. Amma bu faciə öz əhatə dairəsinə görə, törədilmə səbəbinə görə, soyqırımından heç nə ilə fərqlənmir. Məhz “soyqırımı” deməklə bu faciənin dəqiq qiyməti verilir".

Əli Həsənov vurğulayıb ki, bu faciəni törədənlərin hələ də azadlıqda gəzməsi təəssüf doğuran haldır: "Hələ də onlar öz siyasətlərini qururlar. Hələ də onlar öz cəzalarını almayıblar. Onların hər biri beynəlxalq təşkilatlarda Ermənistanı təmsil ediblər. Və bilə-bilə ki, onlar cinayətkardır, buna baxmayaraq, onlara meydan veriblər. Azərbaycan dövləti Xocalı haqqında həqiqətləri dünyaya çatdırmaqla, Xocalı haqqında kitablar nəşr etdirməklə, abidələr qoymaqla erməni xalqına düşmən əhval-ruhiyyəsi aşılamaq istəmirik. Biz erməni xalqının içərisindən çıxmış, uzun müddət hakimiyyətdə olmuş o cinayətkarları dünyaya tanıtdırmaq istəyirik. Bunların törətdiyi əməllərin mahiyyətini dünyaya çatdırmaq istəyirik ki, bir də belə qanlı faciələr tarixdə təkrarlanmasın. Tarix buna qiymət vermədikcə, belə halların təkrarlanması mümkün ola bilər. Buna görə də sülhsevər bəşəriyyəti bu faciəyə düzgün qiymət verməyə çağlırırıq".

Şöbə müdiri əlavə edib ki, Azərbaycan dövləti bölgədə sülhü hamıdan çox istəyir: "Biz kimsənin torpağına göz dikməmişik, bundan sonra da göz dikməyəcəyik. Həmin o təcavüzkar rejimə rəhbərlik edənlər torpaqları işğal altında saxlayırlar. Biz yenə də bu torpaqları sülh yolu ilə geri qaytarmaq istəyirik. Çünki müharibə yenə də günahsız insanların qanı bahasına başa gələcəkdir".



Daha tez məlumatlanmaq üçün Facebook səhifəmizi