Məhkəmənin çıxartdığı qərarı yerinə yetirməyən popçu Aleyna Tilki və ailəsi ifadə verməyə məcbur olublar.
Axşam.az-ın Türkiyə mətbuatına istinadən məlumatına görə, bir müddət əvvəl polisə müğənninin ailəsi tərəfindən saxlanılmağa möhtac olduğu yaşda çalışdırılaraq istismar edildiyi barədə şikayət daxil olub.
Naməlum şəxs tərəfindən edilən şikayətdə 16 yaşlı Tilkinin həm cinsi istismara məruz qaldığı, həm də spirtli içki içilən məkanlarda səhnəyə çıxdığı bildirilib.
Məhkəmə verdiyi qərarın yerinə yetirilməməsi səbəbindən hərəkətə keçib.
İfadəsi alınan müğənni ailəsi tərəfindən istismar edilmədiyini, təhsilini davam etdirməklə yanaşı konsertlərdə də çıxış edərək istedadını ortaya qoyduğunu söyləyib. O, Selena Qomez kimi məşhur ulduzların da onun yaşında olarkən sənətə başladığını və onlar kimi ola biləcəyini deyib.
Ailəsi isə onun təhsilinə böyük önəm verdiklərini, qızlarını heç vaxt istismar etmədiklərini dilə gətiriblər.
Qeyd edək ki, daha öncə də bununla bağlı məsələ qaldırılmış və məhkəmə müğənninin gecə gec saatlara qədər səhnədə olmaması və spirtli içki içilən məkanlarda iştirak etməməsi barədə qərar qəbul etmişdi. Araşdırma davam etdirilir.


