1918-ci ildə erməni cəlladının rəhbərliyi ilə Bakı soyqırımı baş verib
Azərbaycan prezidenti İlham Əliyev və Ermənistanın baş naziri Nikol Paşinyanın iştirakı ilə Münhen Təhlükəsizlik Konfransı çərçivəsində keçirilən Ermənistan-Azərbaycan Dağlıq Qarabağ münaqişəsi ilə bağlı panel müzakirəsi gündəmi zəbt etməkdədir.
Dövlət başçısının Paşinyanı darmadağın etdiyi müzakirədə ən çox diqqətləri çəkən anlardan biri də erməni baş nazirin çıxış edərkən keçmiş Şaumyan rayonunun (indiki Goranboy) Dağlıq Qarabağa aid olduğu barədə danışdığı yalan oldu. Azərbaycan prezidenti yüksək siyasi təcrübəsindən, öz ölkəsinin tarixini dərindən bilmək üstünlüyündən yararlanaraq, buna dərhal reaksiya verdi və “Şaumyan Dağlıq Qarabağa daxil deyil”, - deyə bildirdi. N.Paşinyan mövzudan yayınmağa çalışsa da, İlham Əliyev bir daha ona keçmiş Şaumyan rayonunun Dağlıq Qarabağa aid olmadığını xatırladıb. Əlacsız qalan Paşinyan etdiyi səhvə görə üzr istəyib.
Bütün bunlar isə bir daha onu sübut edib ki, Paşinyan öz ölkəsinin uydurma tarixindən belə xəbərsizdir.
Qeyd edək ki, Şaumyan rayonu 1930-cu ildə təşkil edilib. Goranboy rayonu ilk dəfə Azərbaycan SSR Mərkəzi İcraiyyə Komitəsinin 8 avqust 1930-cu il tarixli qərarı ilə inzibati ərazi bölgüsü və rayonların yaradılması ilə əlaqədar Goranboy kəndi mərkəz olmaqla yaradılıb. Respublika İcraiyyə Komitəsinin 8 sentyabr 1938-ci il tarixli qərarı ilə Goranboy rayonunun adı dəyişdirilərək Qasım İsmayılov adlandırılıb. Azərbaycan Respublikası Ali Sovetinin 12 fevral 1991-ci il tarixli qərarı ilə eyni ərazidə iki rayonun mövcudluğu lüzumsuz sayılmış, Şaumyan (kənd) rayonu ləğv edilərək rayonun keçmiş adı özünə qaytarılmaqla Goranboy rayonu yaradılıb. Azərbaycan Respublikası Ali Sovetinin qərarı ilə 7 fevral 1991-ci ildə ləğv edilərək Qasım İsmayılov rayonunun tərkibinə daxil edilib. Qasım İsmayılovun adı isə dəyişdirilərək Goranboy olub.
Şaumyan qaniçən bir erməni cəlladıdır. Onun əli azərbaycanlıların qanına batıb. 1918-ci ildə Şaumyanın rəhbərliyi ilə Bakı soyqırımı baş verib. Bu zaman minlərlə azərbaycanlı erməni-rus birləşmələri tərəfindən qəddarcasına qətlə yetirilib. Soyqırımın təşkilatçısı və rəhbəri olan Şaumyan başlanğıc üçün qırmızı ordu dəstəsinə açılan provokativ atəşi əsas götürüb. Azərbaycan tarixçiliyinə mart soyqırımı kimi keçən bu hadisələr SSRİ dövründə Müsavat Partiyasının provokasiyası kimi tədris edilirdi.
Şaumyan öz yazılarında bu tarixi cinayətini etiraf edib. O, məqaləsinin birində belə yazıb: “Bizim ordumuza açılan ilk atəşdən istifadə edərək bütün cəbhə boyu hücuma keçdik... Bizim 6 minə yaxın silahlı dəstəmiz vardı. Daşnaksütyunların da bizim tabeçiliyimizə verilmiş 3-4 minə yaxın ordusu vardı. Döyüş soyqırım formasını almışdı, ancaq bundan qaçmaq mümkün deyildi. Biz buna bilərəkdən getdik. Bakını ələ almasaydıq, o, Azərbaycanın paytaxtı elan ediləcəkdi”.
Bu cinayətin etirafı və Paşinyanın bu fikirləri erməni həyasızlığını bir daha ortaya qoyur. Əslində erməni baş nazir normal, savadlı biri olsaydı, ümumiyyətlə, peşəkar bir siyasətçinin, yəni İlham Əliyevin qarşısında belə səhvə yol verməzdi. Aldığı bu ağır travmadan sonra Paşinyan bir daha çətin ki, Azərbaycan prezidentinin qarşısına çıxmağa özündə cəsarət tapsın...
