“Hər bir insanımızı bu məsələdə xüsusi diqqətli olmağa çağırıram. Tovuzda, Aşağı Öysüzlü kəndində bir ailəmizi sağ olsun həkimlərimiz ölümün əlindən ala bildi. Çox narahat bir gün yaşadıq”.

“Qafqazinfo” xəbər verir ki, bunu millət vəkili Qənirə Paşayeva Tovuzda bir ailənin pomidor turşusundan zəhərlənməsi ilə bağlı məsələyə münasibət bildirərkən deyib. Millət vəkili bildirib ki, o davamlı olaraq rayonun baş həkimi Paşa həkimlə, mütəxəsislərlə ailənin vəziyyəti ilə bağlı müzakirələr aparır: “Hər şey bir banka pomidor turşusu yeməklə başlayıb və 7 nəfərlik ailə pomidor turşusundan zəhərlənib. Ailə başçısı Xəqani Yusifov özü də daxil olmaqla həyat yoldaşı Xalidə xanım, qızları 16 yaşlı Ayşə, 14 yaşlı Aygün, 11 yaşlı Aytən, 4 yaşlı Aidə Yusifova və oğlu 9 yaşlı Qismət Yusifov yaxşı ki təcili Tovuz Mərkəzi Rayon Xəstəxanasına çatdırılıb və onlara tez bir zamanda botulizm əlehinə vaksinlə bərabər təcili müzalicələr başlanılıb. Amma bu zəhərlənmə o qədər dəhşətli zəhərlənmədir ki, bəzən insanı xilas etmək gec olur. Çox şükür ki, ailə üzvləri kritik vəziyyətdən çıxdı və vəziyyətləri müsbətə doğru gedir. Mən bütün insanlarımıza səslənmək istəyirəm. Banka turşuları ilə ehtiyatlı və diqqətli olun. Bəzi insanlar bu ailə kimi deyə bilər ki, turşunu biz özümüz hazırlayırıq. Amma bu əsas deyil. Banka turşusunu açdıqda diqqətli olun. Əgər hətta çox az da olsa bulanıqlıq varsa onu yeməyin çünki bu sizin və ailənizin həyatı üçün çox ciddi zərər ola bilər. Bəzən isə faciə ilə bitə bilir. Həkimlərimizin özəlliklə qışa doğru bu kimi problemlərin artması ilə bağlı fikirləri məni bunları yazmağa sövq etdi. Diqqətli olun”.