Prezident İlham Əliyev Şanxay Əməkdaşlıq Təşkilatının Bişkekdə keçiriləcək sammitində iştirak etmək üçün Qırğızıstana yola düşüb. Dövlət başçısının səfərini işıqlandıracaq Azərbaycan jurnalistləri də artıq Bişkekə gediblər.

Avqustun 31-dən sentyabrın 1-dək keçiriləcək sammitdə 17 ölkənin lideri iştirak edəcək. Onların arasında İlham Əliyevlə yanaşı, Türkiyə Prezidenti Rəcəb Tayyib Ərdoğan, Rusiya Prezidenti Vladimir Putin, Çin lideri Si Cinpin, İran Prezidenti Məsud Pezeşkian və Ermənistanın Baş naziri Nikol Paşinyan da var. Tədbirə BMT-nin Baş katibi Antonio Quterreş, MDB və KTMT nümayəndələri də qatılacaqlar.

Genişləndirilmiş “ŞƏT Plus” formatında keçiriləcək görüşlərdə regional təhlükəsizlik, beynəlxalq hüquq, nəqliyyat dəhlizləri, ticarət və rəqəmsal əməkdaşlıq əsas müzakirə mövzuları olacaq. Sammitin sonunda ŞƏT-in 25 illiyinə həsr edilmiş Bişkek Bəyannaməsinin qəbul ediləcəyi gözlənilir.

Azərbaycan ŞƏT-in üzvü deyil, 2016-cı ildən təşkilatın dialoq tərəfdaşıdır. Buna baxmayaraq, Prezident İlham Əliyevin sammitə dəvət olunması Azərbaycanın Avrasiyada artan siyasi çəkisinin göstəricisi hesab edilə bilər. Özbəkistan səfərinin ardınca Bişkekə gediş Bakının Mərkəzi Asiya və Türk dünyası istiqamətində ardıcıl siyasət apardığını göstərir.

Azərbaycan üçün əsas mövzulardan biri Orta Dəhlizin inkişafı, Çin və Mərkəzi Asiyanı Xəzər üzərindən Türkiyə və Avropa ilə birləşdirən nəqliyyat xəttinin gücləndirilməsidir. İran–ABŞ savaşı, Hörmüz böhranı və Rusiya–Ukrayna müharibəsi isə sammitin təhlükəsizlik gündəmini daha da ağırlaşdırır.

Diqqətlər, eyni zamanda, İlham Əliyevin Vladimir Putin və Nikol Paşinyanla mümkün görüşlərinə yönəlib. Bu görüşlər hələ rəsmi təsdiqlənməyib. Lakin Azərbaycan–Rusiya münasibətlərində sualların artdığı bir vaxtda Əliyev–Putin söhbəti xüsusi əhəmiyyət daşıya bilər. Paşinyanla mümkün təmasda isə sülh prosesi, nəqliyyat kommunikasiyaları və Ermənistanın üzərinə götürdüyü öhdəliklər gündəmə gələ bilər.

Beləliklə, Bişkek sammiti Azərbaycan Prezidenti üçün sadəcə çoxtərəfli tədbir deyil. Bu səfər Bakının həm Türk dünyası, həm Mərkəzi Asiya, həm də Avrasiyanın böyük güc mərkəzləri ilə münasibətlərini eyni masada irəlilətmək imkanıdır.

Musavat.com