“İnter” baş məşqçisi Zaur Svanadze mətbuat konfransı keçirib.

O, jurnalistlərin Topaz Premyer Liqasının 10-cu turunun bugünkü “İnter” – “Sumqayıt” matçı (3:1) ilə bağlı sualları cavablandırıb.

- Yaxşı oyun oldu. 3 xal qazandıq. Oyuna yaxşı başlamadıq. Erkən qol buraxdıq. Ancaq sonradan toparlanaraq, qələbə qazanmağı bacardıq. Bu qələbəni Rəşad Qasımova (klubun bugünlərdə istefa verən prezidenti – red.) həsr edirik. Qarşıda bizi “Neftçi”ylə oyun gözləyir. Həmin matçda da qalib gəlməyə çalışacağıq.

- Hiss olunurdu ki, komanda prezidentini qələbəylə yola salmaq istəyir. Rəhbərliyin dəyişməsi “İnter”in oyununa təsir etməyəcək ki?

- Təbii ki, Rəşad Qasımovun istefası futbolçulara az da olsa, təsir edir. Ancaq onlar meydana çıxanda oyun barədə düşünürlər. Həm futbolçular, həm də məşqçilər peşəkardırlar. Bugünkü oyunda sübut etdilər ki, rəhbərlikdəki dəyişiklik oyunumuza təsir etməyəcək.

- “Qəbələ”ylə bu meydandakı oyunda rəqibin iki futbolçusu zədələnmiş və siz meydançanın vəziyyətindən narazı qalmadığınızı bildirmişdiniz. Bu gün isə sizin futbolçu Rauf Əliyev bu meydançada zədələndi. Hələ də meydançadan razısınız?

- Meydançamız idealdan uzaq olsa da, oynamaq olar. O ki qaldı Raufa, o, “Kəpəz”lə görüşdə də zədələnmişdi. Biz ona istirahət vermək istəsək də, bu gün özü meydana çıxmaq istədi. Ümid edirəm ki, “Neftçi”ylə oyunadək vəziyyəti düzələcək.

- Ağabala Ramazanovun oyunundan razı qaldınız?

- Ağabala Ramazanov bu gün birinci hissədə yaxşı təsir bağışlamadı. Ancaq ikinci hissədə fəallaşdı. Onun bu gün meydanda ən yaxşılardan olmasıyla razıyam.

- Bu gün Nizami Hacıyev iki qola imza atdı. Sizcə, o, millidə oynamağa hazırdır?

- Nizami də ikinci hissədə yaxşı oynadı. Məncə, millinin məqşçilər korpusu onun barəsində düşünə bilər. Qarşıda “Neftçi”ylə oyunda da izləyə bilərlər. Mənim komandam üçün tam hazırdır. O ki qaldı milliyə, buna yığmanın məşqçiləri qərar verməlidir.

- Hazırda “Qəbələ”, “Qarabağ” və “İnter” digər komandalardan öndədi. Həm oyuna, həm də qazandıqları xallara görə. Sizcə də, cari mövsümdə mübarizə elə məhz bu 3 klub arasında gedəcək?

- Təbii ki, “Qarabağ” və “Qəbələ”nin bu yerdə qərarlaşması gözlənilən idi. Ancaq “İnter”in uzun müddət 3-cü pillədə qərarlaşacağını gözləmirdim. Məncə, mübarizə hələ irəlidədir. “Neftçi”, AZAL, “Kəpəz” və “Sumqayıt”ı da yaddan çıxarmaq olmaz.

Mənbə: komanda.az