"Qarabağ"la müqaviləsi bitən makedoniyalı futbolçu Muharrem Muharrem yeni klubuna imza atıb.
Türk əsilli makedoniyalı oyunçu Muharem Muharem bu gün atdığı imza ilə 3 illiyinə "Eskişehirspor"a transfer olub.
Rəsmi imzalanma mərasimindən sonra duyğularını dilə gətirən Muharem isə "Eskişehirspor"da uğurlar qazanmaq istədiyini bildirib: "Dövrə arasından bəri "Eskişehirspor"un bütün matçlarını seyr edirdim. Buraya gəldiyim üçün xoşbəxtəm", - deyə futbolçu vurğulayıb.
Qeyd edək ki, 1988-ci il təvəllüdlü oyunçu futbola "Rabotniçki Skopye" komandasında başlayıb. Muharem hücuma meyilli yarımmüdafiəçi qismində çıxış edir. Karierası ərzində "Teteks", "Orduspor", "Rabotniçki" və Azərbaycanın "Qarabağ" klublarında oynayan Muharem ən böyük uğuru ötən mövsüm qazanıb.
"Qarabağ" heyətində çıxış etmiş futbolçu komandası ilə ölkə çempionluğu yaşayıb. Azərbaycan premier liqasında 30 matça çıxan futbolçu 8 qol vurub. "Qarabağ"ın bütün Avropa Liqası matçlarında meydançaya çıxan futbolçu 8 matçda 2 dəfə fərqlənə bilib. Makedoniya millisinin heyətində çıxdığı 11 matçda isə 4 qol vuran Muharem imzalanma mərasimindən sonra yığmanın düşərgəsinə qatılacaq.




Cia.az


