Beynəlxalq Futbol Federasiyası (FİFA) Qətərdə keçiriləcək futbol üzrə dünya çempionatından (DÇ-2022) etibarən DÇ-2022 iştirakçılarının sayının artırılmasını istisna etmir.
"Report" TASS-a istinadən xəbər verir ki, bu barədə FİFA prezidenti Canni İnfantino bildirib.
O, qeyd edib ki, məsələ FİFA-nın Mərakeşdə bu gün keçiriləcək sammitində müzakirə ediləcək.
Futbol üzrə növbəti dünya çempionatı 2022-ci ilin noyabrından 21-dən dekabrın 18-dək Qətərdə keçiriləcək. Yarışın final matçı 80 min tamaşaçı tutan Lüsailə stadionunda baş tutacaq.
Bundan əvvəl FİFA çempionatda iştirak edəcək komandaların sayının 48-ə qədər artırılması ilə bağlı qərar qəbul edib. Qərara əsasən 2026-cı ildə ABŞ-da, Kanadada və Meksikada keçiriləcək futbol üzrə dünya çempionatının iştirakçıları 48 komandadan ibarət olacaq.
Qeyd edək ki, 32 komandanın iştirak etdiyi indiki formatda yarışlar 1998-ci ildən keçirilir.
Daha əvvəl məlum olub ki, 2022-ci ildə Qətərdə keçiriləcək dünya çempionatının bəzi oyunları qonşu ölkələrdə təşkil oluna bilər.
